香港警察學院噚日舉行結業會操，每次警隊有新紮師兄師姐畢業，都會例牌請啲高官嚟檢閱，噚日嘅主禮嘉賓就係年幾前先加入煲呔問責班底嘅民政事務局局長曾德成。如果大家唔善忘，大概記得德成局長喺67年左派暴動期間，因為派發反殖民地傳單而鋃鐺入獄呢段歷史。由港英階下囚，變成特區高官，德成局長企定定接受200幾個畢業學警一齊敬禮，仲要由警隊一哥特警成傍住，梗唔少得訓話一番。局長谷咗40年嘅呢道氣，終於可以爆發出嚟喇。
提醒警員抵抗誘惑
曾德成致辭時，除咗例牌讚吓警隊之外，特別提出三大期望，提醒班準警察做好本份，唔好行差踏錯，其中兩點係：期望班準警員要好似保護自己對眼咁維護警隊嘅聲譽，同埋要不斷持續學習。至於另外一點，就係第時遇到挑戰甚至誘惑時，都要以高尚嘅情操、堅定嘅意志、正直無私嘅態度，廉潔奉公、為民服務。
三大期望睇落合情合理，但有人卻感覺到其實話中有骨。最近警隊爆出唔少醜聞，警員涉嫌非禮、強姦嘅案件，打開報紙不時見到，德成局長嘅一番訓示，好明顯係叫新紮警員要醒醒定定，千祈唔好學啲壞分子前輩咁，做埋啲有損警隊聲譽嘅嘢。
八方翻查資料，40年前嘅德成局長同港英警方係死對頭，當年《大公報》報道話，67年暴動期間佢仲讀緊中學，喺電視新聞目睹新蒲崗膠花廠工人俾警察毆打，痛斥「這些比禽獸還兇的法西斯暴行」，於是加入反英抗暴行列。
當年呼籲暴動被捕
報道更形容佢唔怕打、唔怕拉，有日仲叫細妹用盡力打佢，以備入獄後可以捱打咁話。曾德成後尾因為派政治傳單被警察拉咗，仲判坐監㖭，至於佢喺獄中有冇俾人打，八方無從稽考，但唔使諗都可以feel到佢當年對警察嘅憎恨。
今日嘅德成局長對過去嘅政治敵人乜嘢態度？上屆立法會陳太補選入局，點知俾德成局長指住話係「忽然民生」嘅英國殖民地統治時期官員。由當日同敵人你死我活嘅心態，到噚日都算冇去得咁盡，德成局長唔通怕警察有槍在手，道氣仲要搵其他機會先至爆得晒？
mailto:[email protected]