又到農曆新年，媽咪話今年經濟唔好，留番喺屋企食團年飯，仲要小妹幫手，諗吓有乜賀年菜。小妹食就叻，煮嘢唔係嗰皮。好在識得鴻星酒家嘅廚部主管何寶龍啫，即刻叫佢教番幾招，佢話教我整鮑魚扣玉掌同南瓜翅。
吓，呢兩味嘢好考功夫喎，好似浸亁鮑要成20幾個鐘，浸翅同煲翅都要成10個鐘。何師傅笑笑口話：「知你玩住家菜，梗係教你快靚正嘅方法啦。」先做鮑魚扣玉掌，唔用亁鮑，改用罐頭鮑，免去浸鮑之苦，但罐鮑都要先連罐用水蒸一個鐘，令鮑魚亁身就得。想快，唔用急凍鴨掌，改去街巿買啲炸過嘅鴨掌，將佢蒸番脹身。
中西合璧
做法先煮滾雞湯，再落鮑魚同鴨掌，煮大約5分鐘，再加蠔油，跟住收細火，用生粉埋芡，包住晒啲鮑魚同鴨腳就得，「記住最後先落老抽，如果中段落，會越煮越鹹。」
何師傅又話，第二道中西合璧南瓜翅，選用即食魚翅，用熱水煲熱就得，另將蒸熟南瓜磨成蓉。跟住將上湯煮熱，放入南瓜蓉同鹽，再加入魚翅煮滾就得，大約五分鐘，「最緊要最後加忌廉奶，咁啲翅先夠滑嘞。」何師傅仲乘機賣廣告話，公司新推澳洲特級鮑魚，一罐八隻特價298元；即食高湯排翅特價268元。
逢周日刊出
自製新春菜式食譜
菜式：鮑魚扣玉掌
主材：罐頭鮑魚一罐
配料：已炸鴨掌四隻
調味料：雞湯約450克、蠔油兩湯匙、芡汁（老抽加生粉水）
菜式：南瓜翅
主材：即食魚翅約150克
配料：南瓜蓉約75克
調味料：上湯約150克、少許忌廉奶及鹽
資料來源：何寶龍