日本男星妻夫木聰孭飛嘅NHK大河古裝劇《天地人》上星期已經出街，據知聰仔對新劇相當重視，早前仲約埋阿部寬、常盤貴子等一班演員到澀谷居酒屋食飯聯絡感情。劇中扮演色誘聰仔嘅女忍者長澤正美當晚亦係座上客，當晚長澤對住啱啱同柴崎幸甩拖嘅聰仔猛放生電。06年，長澤曾經同聰仔合演電影《愛與淚相隨》傳緋聞，回復單身嘅聰仔唔知有冇機會同長澤再續未了緣呢？