合富輝煌（733）貼近上市以嚟低位。股票買於低殘時，一於跟基金放長線、釣大魚。
合富主打祖國地產代理業務，被譽為祖國美聯（1200）。剛喺上個月頭，合富搞掂咗單配股，基金大孖沙惠理嘅權益，由原先12.9%，被攤薄到配股後9.9%。但上月中，惠理就一於增持，家陣所佔合富權益又上到14%。除咗惠理，另一家基金ArisaigGreaterChina，揸咗合富4488萬股（佔15.16%）。面對宏調及金融海嘯，基金大孖沙亦一直攬實唔放，對合富情有獨鍾。
要咁睇，美聯享受03年至07年，尤其係香港嘅資產升值潮，股價升咗30倍。家陣全世界睇實祖國，隨住祖國經濟再起飛，合富下一輪有美聯當年咁嘅升勢，真係冇乜出奇。唔講咁長遠，合富家陣NAV折讓仲挨近50%水位，平過美聯一半。合富係咁意上返1倍P/B到兩蚊雞，現價（1.1元）都要升82%。
金威超平冷灶可敲
金威啤酒（124）上星期五忽然異動，股價又係平得交關，冷灶煲一煲。金威最新NAV1.75元，現價（0.79元）折讓近55%，同樣係祖國另一啤酒股青島啤（168），家陣P/B上到3倍樓上，話係品牌效應都好，金威都冇理由平得咁交關。又隨住集團新廠房完全投產，而原料價格喺上年下半年開始紓緩，應該有助金威業績09年度回穩。呢轉冷吼，博金威上返1字頭，現價回報率26%，依然有大把折讓水位。
錢雋