「叻仔」以前做老闆嗰陣，佢間辦公室原來有床鋪同埋浴室，設備相當齊全。雖然叻仔同人講佢擺張床喺公司係方便佢開工開得太夜時，留喺度過夜，浴室亦都係方便佢冲凉之用，但一位佢嘅前員工同關仁講，叻仔醉翁之意不在酒。
講明唔接電話
事關不時有靚女到辦公室探叻仔，每次靚女到訪，都會喺叻仔辦公室逗留好長時間，唔單止咁，每次有靚女上寫字樓，叻仔都會同班手足講到明唔接聽電話，即係唔想俾人打擾佢同靚女傾密偈，究竟有乜咁大件事？唔使畫公仔畫出腸啦！
嗰位前員工同關仁講，當年叻仔雖然同緊「儍女」拍拖，但同佢分手多時嘅「大眼靚女」仍不時喺叻仔辦公室出出入入，佢哋究竟搞乜東東，大家不妨估吓！
Textby關仁
