經濟差，扮靚保養費用自然要縮皮。以前閒閒哋買支Cream都用幾百至幾千蚊，家陣歌仔無得唱，惟有用平貨頂檔。可惜雜牌護膚品又未必敢用，多得網友們能屈能伸搵到好路數，轉戰十蚊店掃平貨，部份產品用完仲大讚超掂！即時搜刮十蚊店護膚化妝品五大口碑王，各位姊妹們由今日起可以一邊扮靚，一邊揸緊手頭上血汗錢！
記者：葉雪芯
攝影：林柏鈞
Model：Yu@Puremodels
Makeup&hair：Meegan
資料來源：BeautyExchange討論區及香港討論區
平嘢有好！
為了慳錢而搽爛塊面，就真係該煨兼抵死！不過化妝品最靠口碑，若然九成九人試過都話Work就差極有個譜。近期各大討論區有不少姊妹開Post討論十蚊店護膚化妝品，反應熱烈，不少女士試用後大讚十蚊價錢，效果媲美貴價貨，我願意試！
NO.1去黑頭王
認住呢支黑口黑面公仔貼紙的炭Mask，此乃日本大創出品、韓國製的手撕式清潔面膜，不少日本妹熱捧，來港後繼續被一眾港女捧到上天，用過後都讚清黑頭勁掂。小記親身試過黑炭Mask威力，雖然黑色糊狀不討好，塗上面後名副其實黑口黑面（奉勸待男友不在場才使用，否則好易嚇親人！）不過用後效果更加驚人，面上粉刺黑頭通通黐得甩，感覺清潔，就連面毛都清埋，十蚊雞一石二鳥，連線面錢都慳番！唯一缺點是撕時有點痛，如果皮薄易敏感姊妹就唔鼓勵試喇！
NO.2爽膚王
對於小記來講，Toner最重要是潤得來又要夠清爽。睇完各位姊妹網友的用後評價，都有些少衝動想買返一支試試。這款Aloe蘆薈化妝水味道淡香，用化妝棉沾上手試，感覺一點都不𣲷黐黐，很快吸收，而且用後皮膚幼滑。同廠出品的魚腥草乳液亦是另一重點推介，聽到「魚腥草」個名好似有點恐怖，但味道其實一點都不腥，反而似西柚味，而且不會有一般乳液的油膩感，非常爽。十蚊有200毫升，抵用！
NO.3滋潤王
被網友稱為冬天之寶！唔識睇日文字唔緊要，其橙色樽加六角形Logo一睇就知有蜜糖成份，十分易認。打開樽蓋已經聞到香味，蜜糖Lotion比一般糊狀乳液較水，容易推開，用後感覺非常水潤，容易被皮膚吸收，最啱秋冬使用！
NO.4睫毛王
平價化妝品推介HighCurlingMascara，韓國製，塗上睫毛後，夠翹又唔易甩，效果豐盈，營造大眼睛必用！最大缺點是只得7ml，對於日日化妝的女士來講未必用得耐，不過價錢只是十蚊，買一支牌子貨等於買十支，值得。
NO.5潤手王
化妝或許可掩蓋歲月痕迹，但手部皮膚呃不了人，所以一支滋潤Handcream對女士們來講至為重要。網友就在十蚊店眾多Handcream中選出這款Q10Handcream為最好用之首，一來Q10對加強皮膚彈性極之有效，二來這款Cream潤而不膩。雖然不算很大支，不過勝在夠小巧，放在手袋隨時用夠方便。若然要吹毛求疵挑剔缺點，就是無香味囉！
粉撲清潔液 超亁淨
一個好用的粉撲十分難求，幾十蚊一個的靚品質粉撲，當然希望物盡其用。聽朋友話試過用盡一切清洗方法，又搓又洗又浸都搞唔掂啲粉底迹，最終粉撲又係塵歸垃圾桶。但姊妹用過十蚊店的粉撲專用清潔液，都激讚難題終於解決了！小記膽粗粗用自己的心愛粉撲試用這清潔液，只需滴幾滴，加少許清水，一邊冲洗一邊搓揉，粉撲便變了新的一樣，非常神奇。台灣、日本和香港更有不少網友撰寫「洗撲文」來歌頌這款粉撲專用清潔液，就知有幾厲害！
其他平價Skincare
市道唔好，大家都慳住使，除了以上十蚊店產品被姊姊們追捧外，以下三款幾十蚊選擇亦有大把Fans！
我的美麗日記面膜$69/10片（m）
台灣的「我的美麗日記」面膜，未到港時已有很多女士到台灣大手入貨，由保濕、抗衰老、控油到鎮靜紓緩都齊。今年正式進駐本港連鎖藥妝店，繼續平玩，早前更推出Boxset裝，旋即被搶購一空！
SANA豆乳洗面膏$45（s）
豆乳用品是不少女士們的心頭好，SANA豆乳洗面膏是其中的王者，一來價錢平，二來保濕功效強勁，用後不會繃緊，多泡又幼滑，網友稱就連洗不去的化妝品殘迹都洗到，150克的份量，日日用都可用足兩個月！
巴黎雪完美去豆無印精華素$49.9（m）
有痘痘問題的少女佳音！透明Gel狀質地清爽、無味、唔刺激皮膚，有網友稱只需搽兩日痘痘即消，最神奇是連暗瘡印都可以去除！最近推出了清凉升級版，用後有少許清凉感，五十蚊唔使有交易，青春期出痘高峯的學生哥都負擔得起！
（m）mannings（29114686）
北角英皇道480號地下B
（j）Jusco十蚊店（25612198）
北角英皇道416-426新都城大廈地庫
（s）Sasa（28953302）
銅鑼灣啓超道14號地下