06年，從事出口貿易的Albert因為公司出現問題，被逼自動流失！小休幾個月後決定全職照顧當時3歲的獨子樂樂，平常在家做partime。不過單純的決定卻經常惹來閒言閒語，令Albert深感香港仍是個保守的地方，故他將自己的經歷集結成《全職爸爸》一書，高呼無悔做湊仔公之餘，更要打破「男主外、女主內」的思想。
記者：林佩婷
攝影：王文忠
你「仲」放假呀？
開始做全職爸爸頭幾日，Albert早上帶樂樂返學。清潔阿姐會打個招呼：「咦，今日放假呀？」他都會笑笑口話係。但兩星期後，仍然見到他在上班時間出門湊仔或買日用品，阿姐及鄰居的語氣也開始探究起來。「佢哋語氣開始懷疑咁問『黃生，點解你又唔使返工？』尤其我太太要輪班，有時深夜先返，啲人到最後忍唔住會問『你其實做盛行？』我初頭都笑笑口話幫朋友屋企做生意。後嚟俾人問得多，自己都唔想答，見𨋢門就心諗快啲打開衝入去唔使煩。最搞笑係有次搭𨋢，啲完全唔識嘅太太畀說話我聽，講咩屋企有人要返工之類嘅說話，最初嗰陣真係未平衡到……」
為現實夫唱婦不隨
除大廈鄰居的關愛眼神，Albert的家人才是最大反對派。「佢哋成日以為我無嘢做，其實自離職後，我一直同朋友合作做Freelance，仍然做貿易，不過轉為副業，Office變為HomeOffice。但老一輩始終認為男人要出去做嘢，有時飲餐茶，最後個個嬲爆爆！」那外父外母的說話該更難聽吧？「太太家人可能較年輕，思想開放啲，覺得我哋重視小朋友，反而無反對。」問到黃太會感到不公平嗎？她搖頭說不會。「我當然都想喺屋企湊仔，但做護士真係比老公做貿易更穩定，唔怕裁員。萬一我唔做，佢又俾人裁咗，無收入咪仲慘。」
重新學湊仔
連家人都不諒解，有後悔過嗎？「完全無，因為小朋友大得快，時間過咗就過咗，況且梗係自己湊最放心。」雖然好有決心做全職爸爸，但初頭成日撞板。「男人真係粗心啲，見仔仔成3歲都係食到一身餸，自然就唔多耐煩鬧個仔。但當大家對得耐，就會發現呢個歲數嘅一定係咁，之後仲勁買育兒書睇。不過我唔會一本書睇到老，因為有時啲書都幾矛盾。好似有本話食飯應該放個鐘，等佢識規律，但另一本又話食飯係享受，唔應該限時限刻。所以書都係用嚟輔助，最緊要根據仔仔實際情況去照顧。」
升級一家之「煮」
既為FullTimeDaddy，每逢學校有甚麼活動，Albert都參與。「通常家長會或活動都得媽咪參加，老師都多數係女士，每當有咩粗重功夫，搬枱搬凳，第一時間總會諗到我。又或者帶啲男仔去廁所，久而久之仲會同太太們傾仔女經、街市行情等。講到最開心，梗係受仔仔歡迎。我哋可以經常喺屋企玩遊戲，好似紅綠燈，又或者一齊玩玩具、睇英文卡通碟等等。」難怪Albert都沒考慮重投勞動巿場。「樂樂就升小學，又係一個新適應期。為開源節流，以前我全職喺屋企都仲有工人負責清潔煮飯，𠵱家辭退咗工人，我包晒屋企嘅嘢，實行做全職家庭煮夫。」
出書搵同道
一年前，Albert想到自己的經歷，就上網想找香港同類爹哋交流一下，誰知外國個案超多，香港就搵極都無，激發出版《全職爸爸》，欲尋同道。$48（藍出版）
