喺呢個咁嘅時勢，周圍裁員又減薪，波友就算有賭本，都理應留番幾個錢傍吓身，無謂攞啲辛苦錢大注大注咁博。不如學吓賭聖同陳刀仔喺村屋向侯賽因報仇時講：「一於刀仔鋸大樹！」，咁先至醒目嘛。
言歸正傳，畢傑雖好少刻意扒冷門嘢，不過周日有幾場真係可能爆得。馬拉加今周作客貝廸斯，「客勝」固然抵撐，但個客W有成3.65倍，可以昅昅。皆因貝廸斯有前線最重心人物沙治奧加西亞停賽，左翼麥克干沙利斯又養傷；馬拉加就「夫添」，巴夏、艾利素同杜達呢個鐵三角嘅威力，我唔止一次讚過，賠率有睇頭怕咩博。博馬拉加大有機會由頭贏到尾，6.5倍「客/客」都要昅實。
桑坦德空襲破「瓦」
另外今期早飛版都同大家預示過，話桑坦德借得2米03嘅施積加盟好使好用，咁啱客軍正選中堅比圖因傷長唞，要由1米76嘅摩利斯頂替，可以諗到施積有幾多高空優勢。桑坦德[-1]嘅「主勝」有3.2倍，都算係值博嘅出擊水位。波膽我更會吼大勝嘅4:1，有40倍㗎。揀多場冷嘢，要葡超塞圖巴爾作客贏歷索斯，4.4倍W好抵博啫！文：畢傑