巴塞隆拿最近成為球迷熱愛球隊，貪佢哋好似以前「細哨」當打時，前邊入得波多，讓幾多都殺得起；不過周日作客奧沙辛拿，小弟就刻意求冷，博26倍「主/客」。
巴塞西甲5連勝，盤路亦亮麗，上仗聯賽補時階段憑耶耶托尼建功，贏馬略卡3:1，也為捧場客開出「主勝」，基本上同巴塞搞對抗都冇好過。但近期巴塞後防慌失失情況又出現，門將域陀華廸斯又有甩手，馬田卡沙利斯、碧基有潛質但唔算穩陣，丹尼爾又輕出，近兩場聯賽巴塞都失波先，好彩攻力夠可以反勝。以奧沙辛拿之前主場可以大炒基達菲5:2，有權爆冷上半場偷雞領先，冷選半全場「主/客」。
愛上澳職魚腩FC悉尼
FC悉尼近期成為小弟澳職愛隊，唔係因為佢勁，而係佢地夠渣，而且場場都失波多。周日FC悉尼主場對威靈頓鳳凰，贏唔到差不多可以同季後賽講拜拜，焗攻之下，更容易暴露後防缺口，冷選威靈頓鳳凰作客3:2呢個34倍波膽。
同日意甲重開，唔多唔少都要支持；戰友藍鑽石誠意推介拿玻里對卡坦尼亞呢場南部打吡，拿玻里可以小勝一球，我撐佢，博主隊贏2:1呢個8倍波膽。文：牽牛