西九管理局噚日委任17個非董事局成員加入轄下六個委員會，任期一年，龔如心契女徐文玠榜上有名，佢係政壇老將夏佳理繼女，系出名門，創辦亞洲藝術文獻庫並任行政總監。06年至07年，佢擔任西九核心文化藝術設施諮詢委員會博物館小組成員。
其他獲委任者包括近年好紅嘅詹瑞文、《無間道》導演劉偉強，政府指佢嘅作品喺本地、內地都好受歡迎，甚至殺入荷李活。港產漫畫界都有代表，黃玉郎愛將、玉皇朝副主席溫紹倫，當局指佢對青少年文化及創意藝術呢兩方面富有經驗。
退休高官李承仕亦獲邀出山，佢做過工務局局長同環境運輸及工務局常任秘書長，西九未來十年要大興土木，搵佢好合理。董事局主席唐英年稱，各委員會就其專注範疇深入討論，務求西九前期工作能夠順利開展。