呢排天寒地凍，政圈亦吹淡風，不過下星期四有好戲上演嘞。煲呔終於出關，15號出席立法會答問大會，政治舞台又開鑼。
煲呔之前話要保命、保本、保工、保信心，相信答問大會都係重點講如何「四保」，泛民主打2012年政改方案，肯定會集中火力追擊；另一重頭戲，係上次答問大會掟蕉場面會否重演。上次毓民一「蕉」就令煲呔收回生果金入息審查建議，據聞煲呔耿耿於懷，所以今次答問大會絕不能有任何差池。
社民連唔會收斂
布殊閃避波鞋鏡頭，煲呔應該重溫多次從中偷師，佢好兄弟鬍鬚曾係武術高手，精通西洋劍，又曾跟隨叔伯學白眉派功夫，識耍螳螂拳、詠春、洪拳，珍藏唔少拳譜秘笈。煲呔想有布殊咁巧妙身手，冇可能唔搵鬍鬚曾學番幾招，萬一再有異物迎面飛來，不論係香蕉、榴槤定波鞋，舉手投足就擋開晒啦。
八方聽聞社民連星期一黨團會議，會討論是否再與煲呔過蕉，而政務司司長唐英年就吹定雞，噚日去信立法會主席曾鈺成，投訴社民連三子日前開立法會時，鬧林瑞麟係「契弟」、「狗官」，長毛更衝到林瑞麟面前當面指罵，唐英年指咁做係冒犯同侮辱官員，屬威脅性行為，要求曾鈺成揸正嚟做，控制會議理性討論。
呢次已經係本屆立法會期內，唐英年第二次投訴議員言行，有人指佢可能想提醒曾鈺成要認真睇實社民連三子，以防煲呔出席答問大會時場面進一步失控。曾鈺成噚日即時回覆，表示當日已要求幾個議員離場，同時將投訴信交全體議員參閱，如何收拾社民連卻冇交代。
毓民則強調，當日用「狗官」形容林瑞麟只係客觀陳述，又指林瑞麟當日都有單單打打社民連，措詞好唔客氣，雙方互有攻訐，唔可以單方面指社民連出口傷人。佢又話日後會繼續針對林瑞麟，唔會收斂，更警告曾鈺成，當日一次過趕走三名社民連議員，係侮辱支持社民連十幾萬選民。當日社民連三人冇就政改方案辯論投票，如果佢哋留低，唔知會㩒邊個掣呢？
mailto:[email protected]