今期「救生圈」由小弟同藍鑽石兄主打，貫徹本欄小注博冷門，為活在「海嘯」下嘅波友打打氣。今次重點推介「打仔格」嘅韋斯咸，小弟從不亂石投林，買一百幾十，博一炮三響！
賭波無癮因為冇肉食，我看又未必，回報視乎策略而定；經濟唔好，裁員減薪，小弟也受影響。唉！人生永遠有遺憾兼帶點無奈，惟有喺度寄情足球；但賭錢更要縮注，唔通好似班高官咁，叫市民多啲消費，跟住自己買一百幾十打毛巾派街坊咩！
「李城」般尼夠穩陣
今日冷門博韋斯咸喺英超作客打敗軍心大亂嘅紐卡素。其實兩隊嘅財政都唔多好，但韋斯咸似已捱過難關，連球衣胸口贊助都有番；就算有艾法寧頓、保耶在過去數天先後離隊，但我看對「打仔」之首蘇拿領軍嘅韋斯咸士氣影響不大。
我最鍾意佢哋嘅雙防中柏加拍麥克盧保或梅連斯，夠晒硬淨，前線調動球員多，有力締4連勝兼破近7次作客紐記不勝紀錄。
另一場，博英甲榜首李斯特城大炒下游奧連特，自信贏面9成也未必要大注，和/主加3:0波膽作變倍器更妙；另外英冠直播尾場般尼也可博贏史雲斯兩球，開3.75倍嘅「主勝」。
今日同石兄份餐單總投注僅220元，只係兩個人睇完場戲，再去食快餐店晚餐嘅價錢，可以一試。
文：蘋果波神