"Iliketomoveitmoveit..."這裏不是非洲，是邁亞美的動物園。因着《荒失失奇兵2》上畫，我趁勢來這兒拜見那隻來自馬達加斯加、出親場都要扭腰煩到爆的「朱利安國王」，見面後我明白班創作人員點解安排咁嘅角色和主題曲畀班狐猴唱，又明白點解戲裏狐猴搶鏡過獅子。因為，佢哋真係無時停，煩到爆呀!!!
記者、攝影：陳慧敏
鳴謝：美國大陸航空、TheAngler&SpaBoutiqueResort
憂鬱混血兒
在JungleIsland裏，Hercules因背負着美麗的愛情故事，加上孤單身世，以一種憂鬱的魅力吸引觀眾。佢係動物園裏獅子爸爸跟老虎媽媽自由戀愛下的愛情結晶。6歲的Hercules站起有11呎高，過半噸重，日日食20磅肉，樣子似媽媽，身材似爸爸，加上有甩色狀的條紋，是動物界的混血兒，卻跟同伴格格不入，成日對住個籠觀望外面世界，用偉仔眼神望住遊客問：WhoamI?
Hercules打個呵欠，個口已經可以咬掉一個頭了！
一拍兩散
這裏的企鵝仔在小劇場裏，由兩個靚女姐姐照顧，又多小朋友圍，個格硬係寸啲。影相時，其中一隻大字形擋住鏡頭，衰衰的眼神好明顯在說：「要影就畀錢！」我企硬，佢轉頭就將另一隻企鵝推落水，一拍兩散！你有本事拿起個士巴拿打我吖笨！
慘遭強吻
園裏的小鱷魚比較凄凉，每次出場都跟兩個鱷魚男上演人鱷共舞，兩男會跟牠玩開口紅綠燈、拖住條尾行。落到水，又有鱷男捉住牠，另一個還要跟牠玩嘴對嘴錫錫！觀眾們見到可憐的小鱷被夾住強吻時，居然拍手歡呼叫好，哎呀，好慘呀！
頑皮小魔怪
這個動物園之所以紅，我相信是PR功夫做得好。PR者，不只是公關小姐，還有整個動物園的動物如鸚鵡、企鵝、馬騮，甚至獅子老虎亦會被安排「接客」，但最紅的，當然是數狐猴。
三個月前，狐猴部開門「接客」，經預約後小朋友可到籠裏親親頑皮鬼。因自小便被飼養員寵壞，見人就黐；加上毛毛軟綿綿，小手指滑溜溜，大受歡迎。站在門前的飼養員煞有介事問：「你準備好未？」一開閘，成群狐猴像放射線式跳出來！四隻躍上大籠頂，兩雙跑上枱，翻身彈上櫃頂，落地再彈去門欄。最乖一隻坐入垃圾桶裏搵食！另一隻則攀住我個頭咬我條相機繩！公關小姐語帶溫柔以雙臂夾住一隻，可以影相喇！才按快門，一撻異物如雪糕機咇下，落在她胸前。哎呀，我頭上呢隻……救命呀！
JungleIsland
地址：1111ParrotJungleTrailMiami,Florida
網頁： http://jungleisland.com/
海豚索吻
以為去到水族館可冷靜吓，才發現這邊的海豚更勤力，一日接客七次！這裏有跟海豚溝通的課程，每次約一小時，教你海洋保育知識和安排海豚逐一跟你獻吻。影相那天有遊客掛住傾偈沒注意牠，牠居然咇咇叫要他親呢！你亦可伏在牠的背上，讓牠帶你極速乘風破浪游過對岸！課程每堂收費約$351，每堂14人。
MiamiSeaquarium
地址：4400RickenbackerCauseway,Miami
網頁： http://www.miamiseaquarium.com/
出門提一提
簽證：持BNO或特區護照均須簽證。查詢：25239011（美國領事館）
機票：乘美國大陸航空由香港經紐約往邁亞美，票價$7,310起。查詢：31985777（美國大陸航空）
住宿：TheAngler&SpaBoutiqueResort標準房價$2,450起。查詢： http://www.theanglersresort.com
貨幣：1美元約兌7.8港元（文中價錢已折算港元）
電壓：120V，兩圓腳插座
下周美國邁亞美天陰，13-23℃
