呢輪市面推出咗好多新款嘅投影機，主打家用全高清投影，東芝卻反其道而行，推出「HDReady」嘅平價LCD投影機，想開拓商業及家居兩用嘅市場；仲有全球首創語音提示功能。部機下星期先正式出街，東芝影像系統部副主任Leon早幾日帶埋部新機，即場示範畀小藍睇。
女聲會作出提醒
Leon話，呢部東芝TLP-X200投影機係走商、家兩用路線，加添咗商用機較少有嘅HDMI端子，可以支援到1080i/p嘅影像訊號，「呢部機唔係高清，只係HDReady，都係接收到1080i/p嘅訊號，可以做到720p高清解像度，價錢就只係一萬蚊樓下，商用之餘，作為入門家用機都唔錯。」
Leon強調，部機最特別係首創語音提示功能，用廣東話、英文同普通話真人發聲。如果用家錯誤操作就會有把女聲作出提醒，又會定時提醒用戶更換零件如燈泡。Leon即場示範，把港女聲又幾溫柔喎。
東芝推出一系列嘅LCD、DLP技術投影機之外，仲玩埋新世代嘅LED投影機。Leon話，4月推出東芝首部LED投影機TDP-F10，售價暫定五千幾蚊。佢仲喺日本總公司班咗部機返嚟，畀小藍先睹為快。部機又細又輕，面積同一張CD咁大，厚度大概有兩吋，重650克，「駁電腦又得，又備有SD插槽同USB接駁口。」
逢周六刊出