讀過英國一本著名足球體育雜誌最近刊出最新球壇富豪排名榜後，加強小弟信心，決捧穩步上揚嘅昆士柏流浪，在周六聯賽主場打敗高雲地利，繼續向升班之路挺進！
兩富商班主誓上英超
喺金融海嘯下，周圍嘅人撲水自救，令財力雄厚者特別耀目，尤其喺班費懸殊嘅英冠賽事，邊隊有錢邊隊恨升班排名自然高啲，唔似得曼城咁嘅班底仲喺英超下游咁羞家。所以小弟今年已鎖定5、6支英冠球隊長追，除了至愛雷丁外，現排第9嘅昆士柏流浪亦有大把水位續向上爬。相反望落榜下游，睇到我幾年前去過嘅聖瑪莉球場，望番冇錢冇好球員壓陣嘅修咸頓，上周末大敗予半力曼聯時嘅差劣表現，真係好擔心隊波再降一級。
從《442》足球雜誌嘅報道，發現昆士柏流浪兩大水喉印度富商米達爾家族及一級方程式巨頭伊基士東，目前已進佔英國足球富豪榜嘅第2（高過車仔班主阿巴）同第5位，以咁嘅財力去支持一支英冠球隊升班，實在唔係難事。從1月轉會剛開不久，已簽下維拉嘅中場魯廸治及高雲地利的後衞波路達利，加埋收回之前借出去嘅門將李爾甘普、後衞雷曼及中場保達，簡直有人滿之患；加上主場賽績亮麗，要破近3季主場對賽全輸給高雲地利的魔咒，良機至。相反高軍惡運連連，之前有主力前鋒羅比森遜受傷要唞數周，剛有後衞馬高斯賀爾在周中操練時鼻骨重創，今季注定在中下游角逐。
伯明翰卡廸夫城串W
另選一條英冠W過關，先取作客到黑池嘅伯明翰，後者一有充足休息，每每打高幾皮，尤其對老牌射手菲臘斯尤其重要；小弟粗略算過，該隊今季每有距上賽約一周時間休息，翌仗勝出率高達8成以上，加上剛獲車仔借出優質攻擊中場史葛冼佳亞效力一個月，貴為升班要角，點會怕黑池呢類蚊型班！而卡廸夫城主場對周中用咗力贏紅魔嘅打比郡，1.6倍W可取。
近5場往績：LWWWL
蘋果波神
水準有目共睹，長跟必有着數。