傳媒界受金融海嘯冲擊，八方都要減薪，無綫新聞部早前已裁員，留低嘅員工雖則保住飯碗，但有人話唔好開心住，事關留得低嘅人可能仲大鑊。
唔知係咪受王維基刺激，據聞TVB話事人方逸華早前落柯打，指示新聞部要爭取高啲收視率，新聞部負責人聽命行事，決定農曆新年後，將原本深夜11點35分播出嘅晚間新聞提早至11點，即係比11點15分先播晚間新聞嘅亞視，仲早15分鐘出街，務求搶閘吸引觀眾。
加插廣告增收入
小道消息稱，TVB晚間新聞收視大約十幾點，六嬸等高層期望提早播新聞，收視可倍升至20點或以上，有人覺得好有挑戰性，新聞部話事人袁志偉卻迎難而上，表現得好有信心可以交足功課畀六嬸。提前播新聞最實際原因，係希望可以賣廣告，𠵱家晚間新聞一氣呵成冇廣告，日後會好似六點半新聞咁加插廣告，為公司創造收入，至於若改革後收視唔達標會點，六嬸未有表示。八方聽聞改革後嘅晚間新聞，仲會加插更多主播同記者閒談環節，配合「互動新聞台」最新口號。