對冲本身就係一種難度頗高的財技，最近港股大跌，有散戶高位無走貨，隔籬有位阿叔隨口講句「點解唔沽期指對冲？」星俠無意中偷聽到，差點笑出聲！對冲？你估咁易咩，阿叔。
睇番年內不少上市公司在對冲上勁損手，便知對冲真係超高難度動作。好似國泰航空（293）最近就要第三度為08年業績發出盈警，表示截至去年12月底，持有的燃油對冲合約賬面虧損76億元，較10月底時的28億元大幅急增。國泰去年上半年成績表已「見紅」6.63億元，恐怕全年業績難寄厚望。
考驗8元支持
報道指出，國泰係利用期權進行燃油對冲，行使價及接貨價介乎90至100美元；去年油價升至140美元以上，但國泰因沽出認沽期權，要不斷高位接貨，換言之油價隨後大跌，國泰就會輸得好「甘」！家陣油價跌成咁，國泰的相關虧損可想而知。
依目前環球經濟情勢判斷，即使唔理油價後市升跌，經濟放緩令客貨運需求急跌，無疑直接打擊國泰本業。外憂內患夾攻，炒國泰都幾頭痕。國泰去年11月底稍為跌穿7元後現反彈，升勢延至近日高位10.26元後才告終，料後市將考驗8元支持，建議先行觀望。
方星俠