現年71歲嘅余慕蓮（余毛）07年因為不忿無綫要佢改簽一年一騷嘅「老人騷」合約，所以約滿之後冇再續約，離開佢效力咗31年嘅娘家，仲記得當時余毛話喺無綫咁多年搵唔到錢，唔想畀無綫一年一個騷縛死。不過佢離開咗無綫唔夠兩年，原來啱啱又吃回頭草，而且仲係簽番一年一騷，真係唔嫁又嫁。
張如城自誇人氣勁
前日馮仁昭打電話畀余毛，問佢點解肯返娘家，佢話：「TVB加我人工，雖然都係一年一個騷，但𠵱家咁嘅時勢唔減人工都算偷笑啦，加上佢哋話舊年我拍嘅《向世界出發》收得喎，見佢哋咁有誠意，咪簽番TVB囉。」不過余毛話今次返去自由度好大，有權揀劇本，佢話：「我冇話過唔再做垃圾婆，只要有得發揮、有戲做，唔係行行企企嗰啲就得㗎啦，因為我真係好鍾意演戲吖嘛。」
今次人工加幾多，余毛話唔方便講，馮仁昭問佢想唔想好似佢老友李香琴咁拍番部《溏心風暴之家好月圓》，余毛話總之有得發揮嘅角色就可以，不過，嚟緊佢會做高志森嘅舞台劇，就算拍劇都要等舞台劇完咗先得。
另外，余慕蓮噚日同張如城、吳君麗喺荃灣出席活動。張如城話最近忙緊喺內地登台，稍後會舉行演唱會，問佢有冇遇過瘋狂歌迷？佢話：「經常啦，最厲害錫到我滿面口水。」佢話遲啲會喺香港派新歌《東方的少年》上台，問佢邊個幫佢派台？佢話：「我有今時今日都係靠人氣，唔使靠公司。」佢又聲稱有大公司傾緊簽佢，但邊間就係秘密，咁大家就拭目以待啦。