美女入廚電視節目大受歡迎，原來中女入廚都有一定號召力！港台節目《升斗之歌》邀請羅范同李麗娟兩個前高官，噚日探訪大角嘴一間社會服務機構嘅長者飯堂，仲搵埋名廚周中師傅，一齊招呼老人家食飯。
羅范雖然做過廉政專員，但老人家未必鍾意飲咖啡，所以佢同媽打李麗娟只係整湯圓畀長者做飯後甜品。八方見佢哋十分落力，親自傳菜、裝飯，客串做樓面侍應有板有眼，差在未着制服。
做東華CEO等審批
至於入到廚房，就係周中師傅嘅主場，兩個前高官大部份時間都係得個睇字。久休待出，羅范蠢蠢欲動，佢噚日話東華董事局原則上同意請佢做CEO，但由於佢未過完冷河，所以要等有關方面正式批准先可以返工，因此暫時不便講太多嘢，總之一切跟足程序做。
梁展文事件後，公務員事務局對審批退休高官再就業好小心，要幾上幾落經多個部門睇清睇楚，加上羅范去年參選港區人大，已被質疑獲政府特別開綠燈，今次審批唔均真啲點得。