金融海嘯令華爾街排名大執位，摩根大通唔單止成為全美最大零售銀行，仲打破花旗集團第七度蟬聯美國債券包銷一哥嘅美夢，榮膺證券包銷三冠王。調查指無論喺美國股票、環球股票同美國債券嘅包銷業務，摩通舊年都係一哥。佢有咁好成績，其實拜花旗所賜，事關花旗喺美國債券包銷已連續6年稱霸，但金融海嘯令花旗幾乎沒頂，要華府注資先至逃出生天，加上債券滯銷令包銷商風險大增，花旗決定接少啲生意，摩通先可以後來居上。
雖然次按危機令金融業受損，但摩通把握機會冷手執個熱煎堆，將瀕臨倒閉嘅華盛頓互惠銀行分行收歸旗下，晉身全美最大零售銀行，成為次按大贏家。