縱橫金融界嘅滙豐一姐梁高美懿，面對幾大場面都淡定自然，見招拆招，偏偏有樣嘢就難到佢，乜嘢？咪拜神囉！
噚日喺滙豐記者會後，梁太主動「晒」手背嘅傷勢，華華見佢手背嗰幾個細窿，雖然已經結痂，但睇到都戥佢肉痛。
「辣」親手望不留痕
梁高美懿同華華講，趁聖誕節假期去咗海南島三亞旅行，享受陽光與海灘，潛完水就食海鮮。不過，一場去到三亞，唔少得去啲名勝參觀吓。正所謂入屋叫人，入廟拜神，何況經濟唔好，人心惶惶，大家難免要求神拜佛，希望自己大吉大利。佢參觀寺廟時，順便拜個神，但喺金融圈冇嘢難到嘅梁太，偏偏裝香拜神呢家嘢就難到一姐。佢話諗住將支細香放落香爐時，本身插喺香爐燒緊嗰支大香嘅炭屎就跌咗落嚟，佢縮唔切，所以搞到玉手「辣」親。不過一姐即係一姐，佢借傷勢比喻，話希望香港經濟好似佢嘅疤痕一樣，好快會過，完全冇問題。