喺03年退出咗冇做港股網上買賣服務嘅億創理財（E*Trade），今日會開記者會宣佈重新出擊。之不過，E*Trade嘅亞太區業務總監陳嘉文早排點都唔肯透露半句玄機，只係話冇裁員計劃，嚟緊亦會加強推廣手機實時報價服務。
講起生招牌嘅網上買賣美股生意，佢就好開心咁話，金融海嘯令美股價格跌番去合理水平，反而吸引更多散客入場掃平貨。舊年10月份，即係雷曼破產之後，集團整體嘅日均成交仍有24.88萬宗，係全年最高紀錄，按年同按月增長都有14.9%，即係話雷曼事件並冇影響投資者入市啦。至於全球新增客戶亦有13.14萬人，按月升67.2%，按年仍升29%。去到11月份，全球日均成交按月雖然倒退12.5%至21.78萬宗，但仍然係全年第二高；11月份新增客戶8萬人，全球客戶總達452.56萬人。淡市之中竟然人財兩旺，難怪咁雄心萬丈逆勢擴張。