為實現老爺李兆基三年抱兩嘅心願，新抱徐子淇07年為丈夫李家誠生咗個千億B女李晞彤後繼續努力造人，早前成功再度懷孕，預計今年4月為李家多添一名成員，盛傳徐子淇今胎係仔，將為李家繼香燈。腹大便便嘅徐子淇噚晚以智恆基金慈善大使身份出席金鐘舉行嘅「LaCr囗meuParty」，問佢腹中塊肉係咪B仔時，佢話：「仔女都冇所謂，我唔想大家咁關注BB嘅性別，不如關注吓啲愛滋遺孤。我照過兩次，第一次醫生話係仔，再照話女，你哋估吓！其實醫生都唔係好清楚，因為有時BB對腳冇擘開，又或者俾臍帶遮住咗。」
「畀BB耕吓田」
有報道話徐子淇戴紅繩保BB平安，佢承認話：「係，之前BB唔係咁穩，𠵱家BB好好，仔女都係天賜嘅。下星期BB就5個月，好多朋友恭喜我話我生仔，又話老爺送樓畀我，我哋一家四口住4,000呎已經好夠，以前我細個（喺澳洲）住8,000呎會驚，細啲有安全感。我最想住木屋，唔係豪宅，住郊區，唔係城市生活，畀BB耕吓田種吓花。我有同老公講過，但佢話保安有問題。」問佢點解想反璞歸真，子淇話：「我細個喺澳洲都係咁，香港小朋友成日掛住打機，太物質化。」
徐子淇話仔定女佢自己心中有數，最緊要BB健康，係咪聰明都冇所謂，而今個農曆新年會一家人去日本旅行，原本佢諗住滑雪，但佢老公話太凍唔好，馮仁昭估計李家誠都係為子淇同個BB着想啫。