OT杯麵之王

香港人工作量之大一直高踞全球頭三位，一場金融海嘯，更令一班打工仔食唔安坐唔落，惟有日日ＯＴ，為求一保飯碗。做到飯都唔得閒食，餓起上嚟，最就手梗係淥個杯麵。做得咁辛苦又點可以待薄自己，食杯麵都要食餐好，今勻就搵咗市面上貴過廿皮嘅杯麵，全部放入經常杯麵醫肚的DJ余宜發把口，由佢揀選邊碗No.1。

記者：王震遠
攝影：王文忠、陳盛臣
Hair：FestivalWalkbyPeople
鳴謝：Munch

聽眾送杯麵

貴價杯麵有幾貴？今次試食咁多杯麵，全部過廿蚊，直情貴過街口檔燒臘店嘅叉燒飯，且全部都係日本入口貨。今日有請商台著名DJ余宜發（發仔）幫口，身為DJ，晚晚做節目到天光，夜麻麻寂寞難奈又肚餓真係會出事，原來發仔咪高峯後經常食杯麵頂肚。發仔仲話自己味覺好靈，「有次同朋友食泰國芋頭飯，一𢳂起已經聞到有臭味！」既愛食杯麵，又天賦異稟，搵發仔試食最啱。「我食杯麵因為貪方便就手，最好係直播室有一壺熱水喺度，平時一次過買十幾個杯麵放喺公司，聽眾都會買朱古力同杯麵畀我。」

咖喱海鮮合味道

如果你係有份買杯麵畀發仔嘅聽眾就請注意，雖說他愛食杯麵，原來佢只食「合味道」，「合味道咁多款之中，最愛食咖喱海鮮，同埋幾隻一丁麵，今次俾我試食呢幾款日本杯麵都OK。我本身鍾意食辣，雖然都知夜晚唔應該食，好唔健康，但係辣辣哋先夠提神。」最高峯試過一次食兩碗杯麵嘅發仔，食完麵原來有個習慣，「食後一定想飲可樂，尤其食完辣嘢之後。」咪以為發仔嘆杯麵好過癮，喺office內就唔敢開餐，事關味道太香，全世界馬上開聲鬧，可能呢個就係食杯麵嘅大忌啦。

最正：麵質好

發仔食評：「最好食！醬油味好濃，又有少少葱味，我本身好鍾意食葱，麵質咁多個之中最好。最鍾意佢有少少辣味，但又唔算好辣。」