牛：幾時都話，畢傑兄貼西班牙波高水準，星期二就跟你買巴塞隆拿上盤，輕輕鬆鬆就大炒馬體會。
畢：贏到3:1我都有啲意外，不過美斯真係勁到冇嘢講，對面都已經用前國腳佩尼亞mark佢，不過美斯一個假身，搞到佩尼亞跌低埋，真係瘀皮。
牛：美斯如果腳風好啲，唔止3球啦；既然巴塞氣勢咁強，嚟緊周日對奧沙辛拿係唔係𡁻梗先？
畢：巴塞3分冇問題，但唔知贏一球定兩球，信心唔夠另一場大。
牛：咦！有咩好介紹先？
畢：星期日英超大戰，我撐硬另一愛將廸高，作客曼聯保不敗，受讓平/半要下盤。
牛：你講到美斯咁勁，歐洲足球先生咪又輸畀C朗；C朗早前休息，更返祖家充電，費Sir無非為今仗贏車仔喎。
畢：C朗攞獎好威咩，其實佢08年上半年就威盡，下半年就越踢越沉，如果巴塞唔係畀列卡特搞到一鑊粥，美斯攞獎呼聲大過C朗啦。
牛：講真，曼聯係目前英超主場王，車仔又係作客王，主場王鬥作客王，又真係好難買。
畢：咁你想齋睇就算？
牛：咁又唔係，你話我冇立場都好，我就撐入球「大」嘞！
畢：你又有道理，曼聯對強隊好似都幾利「大」，先作客1:2輸畀利物浦，作客阿仙奴又輸1:2，係作客車路士和1:1。
牛：難得你心水清，一於車仔周日作客贏2:1，大家齊齊中啦。