鄉議局今年收到嘅最好禮物，當然係村代表終於獲發放津貼，好多村代表期望政府豪派1,000蚊，不過八方聽聞可能要縮水，因為政府最近向鄉議局反建議，希望鄉紳同市民共度時艱，考慮收順啲。據知當局最新建議村代表每月津貼約700蚊，鄉議局方面應該會還價，好有可能一人讓一步，津貼以800蚊好意頭價拍板。
八方從官場方面得到消息，話津貼去唔到1,000蚊，原因之一係四位數觀感上好似好多，為免惹來批評，都係三位數順眼啲較易令人接受。而且呢筆津貼唔係政府應承就派得，仲要得立法會批出撥款，銀碼少啲，游說議員支持都較易開口。政府咁細心，鄉議局心領晒。