近日各大車網中，最HitTopic唔係有乜新車返，而係特別多車主訴晒苦水，話差佬同咖啡大哥殺性大起，瘋狂抄牌，一堆馬路之友猛話政府等錢使。除咗聽成龍話切忌心浮氣躁、駛出真功夫外，今日仲搵嚟車壇黃師傅，實牙實齒點出最陰濕抄牌位，等大家避之則吉，無謂要牛肉亁陪你過牛年吖。
記者：徐影龍
攝影：陳星臣
食過25年夜粥嘅的士佬
的士界卧虎藏龍，好多的士大佬一生大起大落，有車有樓做過老闆，而傳奇之一黃師傅，個朵唔係嚟自佢教人揸車，而係做過幾年跌打師傅，卡片印住二十幾個銜頭，最威水係香港殘疾人士義診協會主席，嚟緊諗住出書，搞埋廣告嗰瓣。影大相時，不期然叫佢扮番黃飛鴻啲招式，點知有板有眼，原來食過25年夜粥，「我師承少林羅漢拳，最出名係玩棍，不過我鍾意耍劍多啲，惟有學埋太極劍。練武之人腦筋清醒啲，動作反應亦快啲，對揸車好有幫助，好似早兩年我喺東廊劈入太古城，踩正地下個大窿，打幾個白鴿轉再反手軚救番架車，乜事都無，全靠我冷靜反應快，我不嬲教人唔好踩死Brake，最易失控，應該一下一下咁踩，再咁咁咁……」
可能的士界工作苦悶，黃師傅揸車無失控，但開始吹到有啲失控；明明問緊佢仲有乜陰濕抄牌位，講唔夠兩句又想當年，「電視遊戲我都撈過，當年第一部紅白機係我帶返嚟香港，可惜NTSC制式唔啱用，同任天堂傾代理，點知要我包銷100萬部，食蕉啦！後尾轉玩抄碟，Konami隻《赤色要塞》俾我改做《精英要塞》，高登行家全部問我攞種Copy。仲有PCEngine部GT（手提機），第一水得我有，30部一個晏晝賣清光……」夠喇夠喇，我唔係Game版，話題就此打住，去片！
港島陰濕位
黃師傅精通港九新界陰人位，不過佢家陣主力走香港線，今日一於集中港島區：
1.中環銀行街
由金鐘道往中環，跟電車路轉入皇后像廣場，兜口兜面一條大直路往滙豐，諗住穿過去往中上環？Sorry，你荷包$450已經飛走咗。千祈唔好俾條大街引誘你，必須左轉入銀行街，乖乖哋入番皇后大道中度塞。
揸咗10年車，港島區唯一陰到我嘅就係呢個位，當時接完邦民女Kama，諗住行西隧走人，掛住同靚女嗲，跟車龍行無睇牌，卒之面前鐵馬即派牛肉亁，用唔熟路同佢求情，阿Sir駕輕就熟答到厭，「個個都係咁講㗎喇，不如我教你點去西隧好過。」呢劑問路費認真貴。
陰濕度：★★★★★
2.上環明愛中心
去到上環，行上亞厘畢道到動植物公園三叉路口，又係一條大直路引你入局，千祈咪跟巴士同綠Van直入堅道，只可左轉入己連拿利，或右轉落亞畢諾道。
陰濕度：★★★★☆
3.堅尼地城吉席街
入到西環，由加多近街轉入吉席街街頭，有個電車站，側邊有個勁似避車處嘅凹位，望清楚原來係雙黃線，咪見到個公廁就貪方便停車上落客呀。
陰濕度：★★★☆☆
4.天后銀幕街
由銅鑼灣往北角方向，行高士威道遇到天后港鐵站時，會有分叉路，右邊大路英皇道為巴士專線，必須行左邊線入銀幕街，再經琉璃街轉番出去英皇道。
陰濕度：★★★☆☆
5.北角碼頭
轉入碼頭後，有條鬼祟路入露天停車場，黃師傅話條路都屬巴士專線，若果唔係泊車而穿過嘅話，差佬都有權抄你牌。雖然唔算陰濕，不過就有啲騎呢。
陰濕度：★★☆☆☆
細Benz鬧市穿插
今日集中圍住港島最塞車嘅地方行，本來都幾辛苦，好彩借嚟嘅BenzA150夠小巧的骰，幾次遇到雙線轉彎，都俾左邊巴士頂咗右邊半條線，架A150依然可輕鬆穿過，換轉其他車就要乖乖等下一盞燈喇，遇着呢類情形，你會明白點解細車仔會有咁多人買。
早排經過小改款嘅A150Avantgarde，加入BClass玩先嘅自泊S位系統，經過幾區鬧市街位，都專登試吓佢靈唔靈，雖然偶爾偵測唔到有車位，不過你跟足指示停得準嘅話，佢都識得自動扭軚倒後泊車，扭個超窄S位仲靚過我喺駕駛學院學車嗰陣，加上車身細小，車位選擇更多，唔似我識嘅女仔朋友咁，見個位窄啲都唔敢泊，寧願繼續搵位。
二十萬多啲有架Benz，唔止車架剛性同車內安全性超班，仲有7前速無段變速自動波畀你玩，行順咗可以好慳油，試過行超順大長途時，電腦Count到耗油只係$0.5，相信係Benz中最慳嘅一位成員。
長命斜長命有法
黃師傅千叮萬矚，叫大家唔好踩死Brake，唔係架車失控先要注意，平常遇着超長下坡道，最好都係拖低一個波，再適時畀Brake減速，好多新牌仔慣性拖住個Brake嚟行，OverHit傳出𤓓味都未醒水，佢就喺花園道見過幾次大大小小嘅失控，最經典係有架私家車飆住落山，收唔切油炒落「霆鋒彎」，成架車打直掛喺欄杆度。
A150Avantgarde
引擎：1,498c.c.直四SOHC
馬力：95hp/5,200rpm
扭力：14.3kgm/3,500-4,000rpm
傳動：7前速無段變速自動波，前驅
查詢：仁孚行（28957288）