容祖兒和陳奕迅(Eason)前晚錄影《勁歌金曲》,對於有傳兩人因不滿無綫頒獎禮賽果而拒絕替《TVB周刊》拍照,Eason表示不知道是否要為《TVB周刊》影相,因為一切皆由唱片公司安排。至於是否不滿結果而黑面?他說:「如果唔滿意我就唔出席,我只係唔滿意自己當晚表現,年年都有是非,毋須刻意介懷。」
祖兒喊寃枉
至於祖兒一聽到「不滿」二字反應甚大說:「邊個話㗎,我完全唔知要影,你問番周刊先,我覺得好寃枉。」祖兒又被指平價接無綫騷,她表示獎項已塵埃落定,沒有必要再深究,她說:「我冇計咁多,因為無綫支持同栽培我,無綫係我另一個大家庭,只要我有時間一定幫手,因為感情大於一切。」但有傳聞指六嬸方逸華認為祖兒未夠班做六連霸,加上楊千嬅答允幫無綫工作半年,故讓她得最受歡迎女歌星,祖兒聞言只說:「唔使信唔信,話我做嘢攞獎好老土。」
採訪:卓寶花
攝影:陳俊強