噚日睇《壹週刊》蔡東豪嘅專欄，睇到最後一句好有感覺，「假如有一間公司股票可以傳給下一代……」蔡東豪選了比亞廸（1211）。
敏妮仲未嫁得出，亦無一男半女，所以仲未有諗過要買一隻股票留畀下一代，不過都好想知道究竟身邊有仔女嘅朋友，遇上呢個問題──假如要你買一間公司嘅股票留畀下一代，你會揀邊隻？究竟佢哋會揀邊隻。
滙豐夠穩陣欠驚喜
敏妮第一時間問光頭仔，佢條件反射立即答：「滙豐（005）！」相信係絕大多數香港人嘅答案。Auntie就揀工行（1398），因為佢話中國遲早會成為全球經濟霸主，至於滙豐，似乎已經過咗增長最高速嘅時代。
光頭仔即刻反駁，認為留畀仔女，起碼係幾十年嘅投資，滙豐一直都冇差池，真係留畀仔女嘅投資，一定要有番咁上下穩陣。Auntie無兒無女，考慮嘅時候好自然冇光頭仔咁肉緊，最重要係呢個問題冇特定答案。
不過，諗深一層，其實大家唔一定要將投資局限喺香港，將眼光放遠啲，敏妮諗起Mr.B之前問：「喺香港點買畢菲特隻股？」
佢所指嘅係巴郡，雖然光頭仔問咗一句：「我個仔大嘅時候，唔知畢菲特仲喺唔喺度噃！」呢個係一個要考慮嘅因素，但就現時嚟講，巴郡不失為一隻穩陣之餘，仲不斷帶畀人驚喜嘅公司。
儲夠錢買巴郡B股
喺香港要買美股唔難，銀行同著名嘅證券行都有得開美股戶口。1股巴郡，有平有貴，巴郡A股噚日個價大概係9.6萬蚊美金，即係75萬港銀；平啲可以買B股，噚日大概賣3200美金，即係兩萬五港銀左右。
雖然美股唔使一整手買，但香港暫時唔覺有月供美股嘅服務，咁大可以儲夠錢就買一手。
溫敏妮
http://wanmanli.com/blogs/