永隆銀行（096）舊年5月左右，喺金融海嘯發生前成功嫁畀招行（3968），嫁得好人家之餘仲有可觀嫁妝；直到噚日，亦即係股權移交後剛啱100日，兩家首次聯手露臉，主人家招行董事長秦曉同永隆新任行政總裁朱琦搞咗個迎春酒會兼推銷張鑲鑽信用卡。一眾富豪、高官同賓架畀面捧場，永隆身價即時upgrade，果真係一入豪門聲價百倍！
誠哥封口唔講沽中行
由於太多大人物到場，大會特別安排保安，包括黑人保鑣為富豪擋駕，又安排重要人物到酒會樓上嘅VIP房，搞到記者兩頭騰，其實傳媒都係想問吓超人點解沽中行（3988）啫，但出席招行酒會嘅佢一於封口，最後連酒會會場都冇到，就同寶哥哥一齊做快閃黨，影張相嘅時間都冇。
好彩仲有彤叔，佢繼大前日鋤Dee同前日打波後，噚日就着住心愛嘅名牌波鞋去酒會，健步如飛咁唔知係咪打完老虎嚟。雖然有保鑣擋駕，彤叔都回應傳媒，話唔會減持中資股，因為內地經濟發展平穩，而今年嘅經濟上半年會放慢啲，股市樓市都已經跌咗，相信今年表現會穩健咁話。
至於嫁咗人嘅永隆，華華同啲管理層傾過，佢哋話暫時唔覺有乜唔同，而且新老闆承諾話，未來18個月都唔會裁員，雖然講嘅時候金融海嘯未去到咁嚴重，怕者都唔會反口嘅，但之後會點就唔敢講嘞。至於永隆舊老闆伍步剛同伍步高當然有出席，但只係話已經退休，銀行嘅事冇乜點理喎。
李華華
mailto:[email protected]
