英格蘭前鋒阿倫史密夫唇紅齒白，算係生得幾靚仔，點想像到佢會變成麥兜？原來因為佢去到邊都俾人賣豬仔。冇法啦，鬼叫打前鋒嘅佢唔識入波，又成日傷咩。呢勻佢俾紐卡素賣豬仔，就算佢點唔願意，睇嚟都難逃喺冰天雪地下上路。
英國傳媒日前爆料，話紐卡素喺冇事前通知史密夫嘅情況下，同米杜士堡斟掂數，賣佢豬仔，用佢嚟交換對方嘅埃及前鋒美度，只要等史密夫傾妥個人條件，交易就宣佈完成。
紐記送去米堡換美度
聽講之前因足踝受傷而唞咗3個月嘅史密夫，知道之後發晒爛渣，話自己好努力咁去操「弗」狀態，相信喺本月尾就可以復出比賽，希望可以喺聖占士公園球場有一番作為，所以死都唔會走，更加唔會同米杜士堡簽約。
講真，史密夫佢當日俾曼聯賣豬仔，佢咪又係堅持唔走留低爭正選，結果咪係要屈服。紐卡素講到明如果佢唔肯去河畔球場，就同佢一拍兩散，喺未來嗰3年半放佢入雪櫃，連預備組都唔畀佢踢，實行用銀紙嚟燃燒佢嘅青春。
命運坎坷想賴死
查實史密夫嘅足球事業都幾坎坷，回想列斯聯喺00/01球季打入歐聯4強，佢係主力成員之一，仲被認為係英格蘭明日之星。之後列斯聯因財困散班，佢喺04年夏天以700萬鎊（約8,050萬港元）過檔曼聯，同列斯聯舊隊友里奧費廸南故劍重逢。之但係，同人唔同命，里奧越踢越紅，幫曼聯贏咗英超、歐聯同埋世冠盃，仲攞成12萬鎊嘅周薪兼做埋隊長；但史密夫喺曼聯嗰3年就冇乜貢獻，外界淨係記得佢喺對利物浦時斷咗足踝而長唞7個月。
猶記得史密夫傷癒復出後，曼聯領隊費格遜公開撐佢，話佢喺奧脫福好有前途，但轉個頭喺一季後一腳伸佢去紐卡素，嗱嗱聲收番600萬鎊好過。
我求大俠八到史密夫嘅周薪成6萬鎊，若然佢賴死唔走，可以白𢭃接近1,100萬鎊人工。之但係，佢得28歲，處於當打之年，而且對足球仲好有熱誠同好有heart，所以即使佢萬個唔願意，相信亦要乖乖哋上嗰架由紐記開去米堡嘅豬籠車。