一年前，坐喺紐約華爾街嘅金融機構高層，個個收花紅收到手軟，羨煞旁人，點知金融海嘯突襲，各大機構唔係執笠，就係焗住合併，高層仲想收花紅？NoWay嘞！
美林揸弗人自討沒趣
啱啱喺元旦日完成收購美林，喺亂世中成為美國最大銀行嘅美國銀行（BankofAmerica），佢哋嘅CEO劉易斯（KennethLewis）好識趣咁同董事會講咗，放棄自己08年嘅花紅，仲寄埋E貓畀幾個手下，話呢個係艱難決定，當係公司表現差嘅懲罰。
至於被吞嘅美林，前排佢哋揸弗人塞恩恃住自己賣盤有功，公司唔使破產就獅子開大口，想攞500萬至1000萬美金做花紅，即刻俾人口誅筆伐，惟有死死氣放棄。
雖則高層唔攞、亦唔敢攞花紅，但美銀為咗達到年慳70億美金嘅目標，江湖傳聞未來3年要裁減一成員工，約莫3萬人，睇怕呢班打工仔都要搵定後路咯。