噚日林D9去立法會就政改議案發言，社民連毓民講到興起，狂鬧林D9係「契弟」，林D9不滿，主席曾鈺成警告毓民唔可以用冒犯性字眼，毓民從善如流，改稱佢「KT」。
毓民又指林D9發言冇料到，係人肉錄音機；林D9反唇相稽，指毓民好out，事關家陣個個都用MP3機，自詡係「人肉MP3」，先進過錄音機。林D9又寸毓民可能需要助聽器，因為總係聽唔到佢發言重點。
毓民不甘被窒，再發言還擊，之後被逐離場，由長毛接力。長毛衝埋林D9面前鬧佢指鹿為馬，曾鈺成即時指令長毛離場。守尾門嘅陳偉業同民建聯議員互罵時高呼「打我吖！」不過佢動口不動手，自動收聲離場。社民連三人就此甩身，冇就政改議案投票。