賓架C到巴黎小住一個月，路經香港，返回上海，呢日遇上定期飯局，在飯堂出現，畀我哋一個驚喜。問賓架C巴黎近況如何，佢話百物減價，益晒佢呢類退休人士，特別係紅酒大平賣，連2005年之珍品都被迫大減價，於是佢日日飲一至兩瓶紅酒，飲到不亦樂乎，又因為到超市買紅酒，十歐羅一瓶者，比比皆是，於是佢唔捨得飲巴黎家中儲存嘅紅酒。賓架C話如果我哋在香港冇輸晒啲錢，不妨買番啲2005年紅酒作投資之用，現在係入貨時機也。
賓架C已退休幾年，享受長俸，又人住上海，冇話心多多炒番幾手，金融海嘯與佢無關，但佢在巴黎得知昔年銀行界朋友德拉維萊切特（Rene-ThierryMagondelaVillehuchet）在紐約自殺身亡，就不勝欷歔。賓架C話二十年前在美國時，與呢位先生相熟，維萊切特年青時靚仔如阿倫狄龍風度翩翩，彈得一手好鋼琴，在家（中央公園東）請客時，久不久就露一手，加上佢出身名門（Magon一族在拿破崙年代已有威名），娶得美國富家女，老早衣食無憂，印印腳嘆世界好多年，想不到呢次栽在馬多夫手上，作為法國同鄉名人及自己家族之投資顧問，竟然交咗十億美元畀馬多夫投資，全部損失晒。賓架C話：「照計維萊切特唔見好多錢之後，仍然可以生活豪華，不過佢視名譽如生命，愧對江東父老，故一死了之，喺十二月二十三日自殺。」
由貴族、老牌家族以至新興中產階段，皆受金融海嘯拖累，損失慘重，故此賓架C話：「使乜搵咁多錢，有咗錢又再醉心搵更多嘅錢吖，我在巴黎一個月，聽到好多中小型私人銀行投資失敗，保險公司亦無一倖免，唔知到幾時先至可以恢復元氣，倒不如飲多幾樽紅酒好過。」法國酒商眼見國內不景，開始打亞洲主意，香港撤銷酒稅之後，好自然成為法國酒商眼中之亞洲跳板，唔怪得已有本地及外國商人在屯門搵工廠大廈開紅酒倉庫，擺定個陣勢先。