前日由AC米蘭對漢堡場杜拜足球挑戰賽，紅黑直間版嘅碧咸首次亮相，可惜呢位33歲嘅老萬人迷，正選上陣打咗半場就被換出。我求大客覺得碧咸嘅表現都唔係大問題，最弊係體能狀態同歐洲聯賽脫晒節，未來兩個月實不敢樂觀，隨時嘔電！
處子戰踢半場冇料到
其實，周二開賽前就有消息指，碧咸周一操練時肌肉輕微拉傷。AC官網第一次公佈正選陣容就冇佢份，點知第2次公佈個陣就出現碧咸個名，唔知係咪酋長背後施壓啦！結果，碧咸在AC處子戰以右中場姿態打咗半場，失誤多多、建設性傳送得一次，半場被換出；下半場朗拿甸奴射入12碼，結果雙方打成1:1，最後AC互射12碼以4:3勝出。
碧咸點解冇態？好明顯同銀河隊無緣季後賽有關。呢兩個月碧咸正處於度假狀態，除咗去NBA球隊湖人主場睇波兼昅籮，或者陪老婆維多莉亞行街，只係隨隊去新西蘭打熱身賽，算係出過吓汗、鬆過吓筋骨；上月底正式加盟AC，上周一隨隊到杜拜，先係正式開始正常球隊操練，因此腳軟軟一啲都唔奇。
跟操一星期嗌救命
不過，碧咸呢幾季喺美職聯過慣好日子，𠵱家跟AC操練一個禮拜啫，就搞到肌肉拉傷，嗌晒救命，可見未來呢兩個月唔易捱。我求大俠唔係嚇佢，AC操練好有系統，米蘭實驗室每日仲會收集球員嘅身體數據，邊個有態冇態，操練有冇偷懶都一目了然。所以AC敢執埋咁多老鬼球員，就係有信心保養好佢哋，打到40幾歲先退休。
好似呢次杜拜備戰，AC從朝早到夜晚都安排得好密。朝早8點15分morningcall，9點半操練，先去健身室舉鐵操肌肉；下晝兩點戰術操練，先長跑後短跑，最後練習賽埋尾。夜晚呢？就放球員同老婆仔女自由活動，感受一下杜拜嘅風土人情。
從上述安排所見，教練肥安都有畀球員唞吓氣，如果碧咸咁都頂唔順，就真係令人擔心啦！不過咁樣對碧咸嫂未嘗唔係好事，因為老公操到腳軟，仲邊有精力搞搞震呢？唔怪得佢可安心返美國湊仔，由得碧咸一人喺米蘭啦！
