四叔李兆基舊年自封冒牌股神，仲話投資水瓜打狗唔見一截，咁究竟輸咗幾多呢？
噚日華華有機會同彤叔傾偈，彤叔同四叔一向老友鬼鬼，梗係順便問吓佢知唔知四叔輸幾多。點知一向精靈嘅彤叔話：「佢贏咁多，輸番少少啫。」即係幾多？Sorry，冇講噃！
四叔第二個孫未知男女
咁09年大家另一期待，就係四叔個靚新抱徐子淇，今年會為四叔添個男孫定女孫呢？彤叔話：「我有問佢（四叔）個孫係男定女，佢話佢都唔知。」咁你有冇諗住買乜禮物？彤叔話：「呢啲梗有嘅！」
講開又講，噚日一班大學生去到中環新世界大廈示威，佢哋就係舊年指玖龍紙業（2689）係血汗工廠嘅「大學師生監察無良企業行動」（SACOM），今次就話新世界旗下嘅新世界中國（917）係血汗工場，喺內地地盤無視新勞動法，剝削工人，工時過長又拖糧。
彤叔噚日回應話，當中好多工人其實係外判嘅，唔係新世界嘅，佢話集團一向好重視內地工人，今次亦好重視呢單嘢，唔會容許對啲工人唔好。
大學生踩場話新中無良
點重視法？新中噚日嘅回應書足足有39頁，話集團一直善待員工，重視安全同福利，從來唔容許承建商或分判商非法對待工人喎。佢哋仲特別澄清，話SACOM報告提及嘅「深圳－四季山水」同長春項目，其實佢哋冇份，但唔知點解入咗佢數。呢份報告特登去番被指控嘅地盤調查，有相又有員工糧單做證，可見其重視程度。
李華華
mailto:[email protected]