章子怡加勒比海裸曬震動全球，喺香港，葉劉騷身材都令一眾闊太名媛震驚。葉劉近年積極修身塑造新形象，周末得閒會去CountryClub做gym，上流社會近日傳出耳語，指葉劉舊年競選時，雖然忙於拉票，但都堅持抽空去做gym，跑步做機之餘，仲周圍social同人打招呼，好鬼friendly。
做gym全程cool樣
不過最近有闊太喺club度再見到葉劉，對方卻只顧做運動，全程一副cool樣唔騷人，態度同參選時唔同晒。呢個八卦消息，據講近日成為闊太、名媛熱門話題，有人講開又講，指葉劉刻苦做gym終於有成，𠵱家做gym時着得好sexy，至於有幾sexy，有關人等話不便透露，叫八方自行想像。
八方自問唔敢想像葉劉如何做gym，但如果佢操到好似章國寶咁fit，有一副健美身材，怕乜show俾人睇？其他闊太個個水桶腰、榕樹腳，就梗係要遮遮掩掩啦！講是非只係口部運動，對減磅冇幫助，唔抵得人哋show身材，少說話多運動好過啦！葉劉勤於做gym，對扮靚亦越來越有心得，佢噚日話已傳授秘訣畀個女，首要係減肥。
葉劉女兒Cynthia細個時肥嘟嘟，03年沙士停課，更一發不可收拾，因為留喺屋企猛食零食，後來到美國讀書，開始大個女識節制，減少食油炸嘢，年幾時間瘦咗10磅。葉劉又督促個女勤力做gym，「美國啲gym開到午夜12點，臨瞓前都可以做運動。」
唔急同蘇錦樑對親家
葉劉咁緊張要個女減肥，無非唔想佢學自己咁錯過姻緣。早前葉劉兩母女出席一個公開活動，見到商務及經濟發展局副局長蘇錦樑，大家十分好傾，後來就傳出蘇錦樑想介紹自己個仔畀葉劉女兒識嘅傳聞，葉劉對此十分受落，「我都安慰啲，個女𠵱家有人問津，做阿媽嘅，最怕就係個女讀完書後冇人要。」
葉劉話女兒目前應該未拍拖，亦冇乜追求者，多數係同同學一齊做project，搵唔搵到男朋友，做阿媽嘅急唔嚟，佢亦解釋話唔急於同蘇錦樑「對親家」，「唔使急，佢（蘇錦樑兒子）係醫生嚟喎。」mailto:[email protected]