貪靚之心，人人有之，自古就有唔少男人衰喺美色之下。既然美色有用，大家就無所不用其極執靚個Look自抬身價，塗脂抹粉屬小兒科，剝皮拆骨再砌埋一堆扮極品，就更加有本事攞你命！為咗自身安全，買二手車大家就記緊唔好「以貌取車」，即使「美色」當前都要又昅又摸驗清楚。衝動猴擒，買二手車大忌。
記者：黎頌詩
攝影：王文忠
鳴謝：22621118（大昌行易手車）
Lawrence教路：
「整過容，一定有痕迹！」
大昌行易手車部經理Lawrence，對汽車維修及檢查易手車都經驗豐富，見過唔少「百鳥歸巢」積木車，又或者弄虛作假化裝扮靚車嘅蠱惑招。由佢帶大家抽絲剝繭，搵出蠱惑位，等你唔再受美麗外表迷惑而令身心受損。
Check牌簿5要項
1.對清楚登記車主姓名，確保賣方為該車車主。
2.引擎和底盤號碼要與刻於車上的資料相同。
3.登記成為車主日期太短，就要提高警惕。
4.若車齡不長就易手多次，原因值得思考。
5.BrandNew較好，所有資料都較準確。
查料！急脫手有古怪
未睇車，第一件事就要睇牌簿，牌簿屬政府簽發文件，本來唔假得，不過Lawrence就話睇牌簿，一樣可以搵出可疑位。要求賣方提出牌簿正本，核對車主名、車身同引擎編號，如果有任何懷疑，唔使諗，即走。再睇睇車主持有該車嘅時間，如果太短，對方嘅身份可能係經紀，又或者部車因某些問題要急於脫手。至於手數，當然越少越好，除非係勁貴超跑，否則二、三手已係極限。最後一個檢查要點係車輛狀況一欄。BrandNew的是全新進口，基本沒做手腳位，而ImportUsedy就曾於外國出牌，進口前資料難以確認，係咪好車，不妨驗完先講。
睇相！車陣有傷唔使諗
同部車「睇相」係最重要一環，因為絕大部份弄虛作假嘅痕迹，都可經過細心觀察而無所遁形。Lawrence認為，車陣就如人嘅脊骨，車陣損毀，屬不可彌補嘅創傷，絕不能接受，因為對駕駛者嘅安全有極大威脅。撞擊係車陣受損嘅原因，所以首先要判斷車輛曾否受撞擊。先檢查頭龍門架及兩頭沙板螺絲位是否曾被鬆開，再睇車尾士啤胎位及吸震膠接駁位有否移位或曾修補。若有可疑要查車陣，就一定要將車唧起，焊接痕迹通常會喺原本嘅接駁位上，細心觀察有否貫穿車陣兩邊嘅可疑線條，有嘅話，唔使多諗！
實試！高速彎路加長命斜
最後上車撻匙睇里數錶──最普遍作假嘅地方，即使專業人士亦難判斷里數錶有否被調校。Lawrence話，可以由其他方面考證。睇座椅同安全帶，若座椅凹陷、皮面有裂紋，又或安全帶邊有磨擦而成嘅細絲，則可推斷行車里數至少有八至十萬公里，若跟里數錶顯示有大距離差異，就要醒少少啦。檢查所有燈正常後就可開車，最好走高速公路、彎路加長命斜。Lawrence指，車在時速八十至九十公里時，問題會完全浮現。而上長命斜可考驗波箱性能、彎路就展示車軚同軚環嘅表現。通通過關？咁呢部車就諗得過！
