十個男仔九個打機，電玩太郎打機打到做Game書總編，竟自謙未算狂迷，因為：「我未試過打機打足廿四小時，我唔會係打機猝死嗰類人。」打機打足廿年，是性格內向還是遊戲機弄得自己生活圈子狹窄，連他都搞不清。難識女性朋友、花費過百萬、打到腰骨手指痛，他說統統不算犧牲，「話係犧牲，咁咪否定咗我呢廿年人生？」
記者：許維雅
攝影：林栢鈞
狂迷編號：024
姓名：陳若珩（電玩太郎，38歲）
年資：21年（由正式擁有第一部遊戲機開始計算）
總花費：估計約一百萬
職業：《GameWeekly》遊戲攻略周刊主編
最珍藏：小島秀夫簽名的《MetalGear》金版
夢想：打跛腳唔使憂
打機打到80歲
自1988年爸爸託朋友買第一部「小天才」遊戲機代替紅白機，阿珩打機打足21年無間斷。一眾機迷封他為神，他筆名叫「電玩太郎」，於Game書界響徹雲霄，擔當遊戲機雜誌主編11年，發夢都想着對戰攻略。這份耐力不是人人可以長捱，問他打機是工作還是娛樂，他笑說：「一半一半啦，我出Game書，有時唔鍾意打嘅Game都要硬食，但當然唔會我食晒啦，哈哈，呢啲係主編權利。」不喜歡的Game，大可以不打，自己忍不住打了吧，「嘻嘻，都係嘅！但如果唔打，我咪無價值無存在意義？」出發點為工作，硬要機不離手21年，旁人想會是苦差，但我卻感受到他樂在其中，因為他反應極快地說：「我打機，唔會得過且過㗎。」總有日打到身心俱疲吧？「無諗過咁長遠，可能打到80歲啦，我媽咪就快80歲都仲打緊機啦，哈。」
我是Gamer
訪問期間，他前後講過數次：「我有節制，買Game打機唔算迷，好多人迷過我啦。」他嘗試洗脫機迷身份，狡辯自己只是Gamer，堅稱每一段時期只對某機種特別喜好，之前迷Dreamcast，現在不愛Wii愛XBox360，不過要強調的是，他家有一部封塵Wii、三部備用XBox360。「Gamer好用心煲Game，啱玩的話一定會打爆為止，一個禮拜會打20個鐘頭嘅人，就算係Gamer。」當每星期打五日機，均除每日玩4小時他肯收機？我不信！「咁又好似唔止20個鐘，40個鐘啦！」有無試過打到停不了手？「未試過喎，都話我有節制咯，我一攰就要瞓㗎喇，同埋點都會工作行先，唔似有啲同事試過掛住打機，打到唔記得交稿，我無試過打足24小時機，我一定唔會因為打機猝死。」何謂迷，實在好難定義，阿珩的「迷」其實是迷失的「迷」，從他說話的自相矛盾可發覺，「咁我都算迷嘅，都有廢寢忘餐嘅時候，好彩同屋企住，起碼有阿媽叫我開飯。有時我都覺得半世人掛住打機，令到自己生活空間變得好狹窄。」試過只用10多小時打爆機、堅持每隻Game買正版、明知Game不值錢亦花過百萬收藏，他淡然道：「Game唔值錢，但我唔會賣番出去，當你鍾意一樣嘢，你只會想第一時間擁有，你唔會吝嗇，會覺得值得。」
媽咪最叻打麻雀Game
房內曾值一百萬的電玩，現在可能只值數千元，有後悔過嗎？「陪咗我咁多年，換到咁多年快樂，值嘅。唔通話唔值咩，咁咪否定咗我呢廿年人生？」談錢，他可以很瀟灑，真正欷歔的，是沒有女朋友！打機累事？「係啩，其實我都幾內向，無膽識女仔。」老實，我覺得他尚算健談，「啲人成日話沉迷打機嘅人係隱青，咁我係隱佬囉。呢個圈真係唔多朋友，識女性朋友尤其難，有時打Onlinegame都識到人，但清一色係仔，仲只限網上交談。我都係唔適合拍拖，可能最後要搵婚姻介紹所，隨緣啦。」若將來有女友，會為她放棄打機嗎？「打機又打唔到成世嘅，睇吓妥協到乜地步啦，始終𠵱家無女朋友，有先講啦。」
打到手指痛、要爸爸捽腰骨、不見天日弄得臉色如白紙，父母不鬧？珩媽媽插嘴：「無得鬧！」阿珩笑說：「有呀！鬧過我一次二世祖，不過我中五之後，打機都係用自己錢！」他感染媽咪一起打機，將過氣SEGASATURN轉贈她教她玩，「佢最鍾意打麻雀。」難得媽咪投仔所好，皆大歡喜亦是幸福事。
電車男本色
囗當初在《新報》做排版兼職寫Game，誰知一寫Game，就把他推上打廿年機的絕路。
囗他從不買衫，穿的是《SmackDownvsRAW》遊戲Game所送贈品，更笑言：「啲Game出埋褲就好喇。」
囗終日打機，打到手指痛，尤其是《高達無雙》，打足21年，算有對機械手都甩螺絲了吧。
囗人生除打機，最大娛樂是看漫畫，貫徹電車男喜好。
一屋電玩
