清官難審家庭事,家庭暴力條例修訂問題,近日有如政黨頭上蝨、背上芒,民主黨因此鬧內訌,最新發展公民黨也受牽連,觸發茶杯裏的風波。前日公民黨港島支部執委副主席陳家明同其他四名黨員聯署,要求將家暴條例改名為「居所暴力條例」,佢哋又批評議員湯家驊漠視黨員意見,唔問過黨員就表態。
湯大狀無端端被黨友鬧到一頭霧水,因為從來冇人搵佢傾呢單嘢,無故被屈令佢十分勞氣。陳家明噚日自行了斷,主動澄清,表示了解事件後,發現湯大狀真係唔知情,可能係黨內溝通出問題累事。佢又話秘書長陳家洛已經安排黨員同湯大狀會面,大家心平氣和討論。