索馬里海盜猖獗，好多海員聞風喪膽，香港海員工會主席郭錦華同八方講，近月有三艘香港註冊貨輪喺索馬里出事，其中一艘至今仍未獲釋，而曾經被挾持嘅「大建號」，船上總管係香港人。
呢位港人總管被挾持逾60日，脫險後同工會講，海盜其實幾友善，絕不打海員私人財產主意，但會沒收各人手機不予歸還；當佢哋收到贖金，就會每人派100蚊美金作賠償，咁做唔知算唔算盜亦有道。
行船跑馬三分險，香港航業海員合併工會會務主任李國強話，𠵱家全港僅得百幾個遠洋船員，工會正同船公司爭取，要求每艘船最少請兩個後生仔做見習生，可以創造2,000個就業機會。