新地（016）郭氏家族老大郭炳湘雖然冇做主席兼行政總裁，但依然有影響力，早前佢提出集團買地同招標程序有問題，集團委任嘅畢馬威上個月就做咗個獨立檢討報告，話郭老大嘅指控不成立兼毫無根據。但似乎有新地小股東唔多滿意，噚日喺部份報章登咗封公開信畀董事局，要求公開報告內容。新地不敢怠慢，迅速回應。
想公開招標檢討報告
小股東指，「因為有關指控由前主席提出，事關重大」，認為「涉及公司管治有不當的問題，不可以用三言兩語輕輕帶過」，質疑董事局有冇詳細睇晒份報告？係咪所有董事都接納個結論？檢討嘅會計師行係咪夠獨立？
華華傍晚收到新地回應，發言人話，檢討報告由審核委員會負責，委員由非執董組成，加上會計師行唔係新地核數師，夠晒獨立性咁話；而審核委員會亦已接納報告，覺得滿意，仲強調機制完善，會以股東及公司利益行先云云。
總之都係「三幅被」，唔知班小股東滿唔滿意嘞。