一年一度嘅盛事好多，恒生銀行義工隊就選擇去雲南興建廁所。恒生自07年開始贊助長春社，為雲南省1200個村民起300個沼氣廁所，上個月，亦即係贊助呢個項目嘅第二年，班恒生義工再組團去起廁所。
今次佢哋去咗一個離昆明市約5個鐘車程，叫蜆山縣嘅地方，為村民起沼氣廁所。所謂沼氣廁所，即係廁所經過特別渠道，將糞便收集到地下沼氣池，再將沼氣轉化為能源發電，等啲村民有電煮食同照明，唔使劈柴咁辛苦之餘，仲救咗唔少樹木。
據講呢次有13個恒生義工跟長春社人員北上，佢哋唔係攞假去做義工，而係犧牲周末假期做咗三日兩夜，起廁所之前，仲要同啲村民溝通吓，了解佢哋嘅需要。