財經專欄作家方卓如去年comeout以龔耀輝真身出選會計界,參選前仲辭去上市公司中國金融租賃集團行政總裁高職,以示決心,可惜落選而回。不過方卓如繼續活躍於三十會,而且忙緊新工作,做唔成議員,唔係好大鑊嘅事。
據方卓如友好稱,方卓如雖然冇做中國金融租賃CEO,不過近日仍用公司秘書,好似以前咁,有人好奇問佢是否復職,佢卻話自己只係顧問。方卓如則同八方講,自己並非回巢,𠵱家有新project搞緊,等時機成熟就會公開。
譚香文組「愛護香港」
另一會計界落選人譚香文亦有新搞作,同另外兩個落選議員張超雄、郭家麒組成「愛護香港」組織。佢同八方講,計劃設立一個學障兒童網上資源中心,又會為長者、殘疾人士爭取交通優惠,已有一啲會計界、社福界人士同醫生加入。
雖然落選,譚香文話焉知非福,因為過去四年忙於政務,無暇投資,令佢避過跌市損手,而佢落選後賣出星河明居其中一個單位獲利,當時樓市仲未大跌,𠵱家樓價已經跌咗近兩成。冇做議員,譚香文仍開地區辦事處,位於佐敦,個舖位係佢父親遺產,𠵱家用嚟做落腳點。