回顧2008無謂，不如放長單眼（必須留有餘地，雙眼都出錯就冇圜轉了），預視本年度出現的大趨勢大事件，扮先知先覺，不是任志剛和四叔的專利。
估計今年最流行的打工仔術語是，睇餸食飯。睇餸是真的，齋睇住隻燒鵝髀和肥叉燒，送白飯咁解。鏞記門口肯定最多「飯都愛」，隨時迫爆玻璃。
高官購物騷做得太求其，唔入戲，被傳媒彈到一戙都冇。騷應該不會繼續來了，改為高官局長與副局助理們的家眷，由特首夫人帶領，落區向街坊呼籲：買嘢！買嘢！買嘢！後邊一班阿太和應：洗腳！洗腳！唔使抹腳！翌日肯定雄霸A1頭條和娛樂頭版。
美容纖體行業本年度全線執笠的可能性是100%。事關大小機構都進行殘酷裁員大計，打工族聽見瘦身就驚到嘔，打工仔被迫全年「厭食」，瘦過條柴，O碼又再流行。
不折騰了，特首終於認命，決定做郵輪特首，離岸多過埋岸，靜靜倒數自己腳痛下台的日子。