02年登陸嘅日版車仔ist，六年幾嚟家族都係人丁單薄，除咗Sport版加包圍等小搞作，就要到07年日本先有大變身新版登場，嚴格嚟講，同門兄弟就得新舊兩個。今日難得「兄弟」相逢，竟然係爭住要一較高下！08版師弟年輕力壯大大隻，力壓03版小師兄。不過原來師兄小巧得嚟動感十足，仲竟然有幾分古典味，別有魅力。
記者：黎頌詩
攝影：楊錦文
Model：Vanessa
查詢：偉昌車行（23030328）
小師兄 跑Look最煞食
師弟恃住大嚿好力食住上，大家以為較小巧力弱嘅師兄就輸開巷？咁就錯啦！先嚟六萬八靚價位，喺大家都俾「海嘯」省到暈嘅今日，唔到你唔望多兩眼。睇多眼，即時就俾師兄獨有嘅型格迷住。呢部03ist，配咗原廠Sporty包圍，一樣有Xenon燈，講線條、講動感，一定贏偏向厚實穩重嘅新版，再加埋一塊誇張嘅尾翼同好有MINIFeel嘅銀色側鏡，竟然又有幾分跑味。講到跑味，舊版嘅內櫳一樣贏。雖然中控台鋪排有點懷舊味道，而且個人唔多喜歡錶板置於中控台上，但配上電鍍裝飾及佈滿小孔嘅軚環，跑味甚濃。小師兄嘅內櫳空間不及新一代，不過亦唔見得有壓迫感，坐得舒服之餘座椅一樣可靈活變化提升搬運空間。動力只係比新版少二十多匹，推動較小巧嘅車身，充滿活力嘅個性表露無遺。
1.15吋輪圈略細，不過襯上Sporty側裙，型晒。
2.錶板置於中控台上，佈局歸一，旁邊兩個氣口造型似足飛機引擎。
3.舊版獨有，車尾誇張定風翼連指揮燈。
4.尾箱方形銀色金屬片，跟尾燈線條呼應。
5.車側玻璃旁有這種反光度高嘅仿碳纖裝飾，多了點野性。
6.側鏡鋼金銀色具古典味道。
7.新舊版都有仿桶椅，不過舊版嘅灰黑配搭跑格更突出。
03ist規格
引擎：1,496cc直四VVT-i
馬力：約109匹
傳動：4前速自動波
行車里數：26,000km
售價：$68,000
大師弟 好力又穩重
面世多年第一次大變身，以新面孔登場嘅08ist固然得戚有理。先講動力，1.8公升引擎，同門最強。後生自然行動力強，估唔到係新一代嘅穩重感都有增無減。兩「兄弟」一拍埋，「細佬」明顯身形更大，整個車身體積都有提升，輪圈亦明顯加大。事實上，新版ist喺線條上亦作了大刀闊斧嘅改動，厚實嘅線條，令車頭造型相當硬朗，可見係有意識地增強SUV嘅體態，無疑看起來比舊版更個性化。雖然08ist依然保住得意車仔本色，不過內櫳空間相當闊落，除了「擴空」效果，也多得前座增加了30mm移動距離嘅靈活性，加上仲有埋恆溫冷氣同Keyless功能，結果就梗係更舒適更方便啦！新版嘅內櫳鋪排同樣大執位，風格就跟外觀一樣得意有個性。錶板移往大路位置即軚環前方，不過卻用上少見嘅扇形。中控台更趣緻，中間三個圓環最搶眼，不來兩邊為按鈕，中間則為液晶顯示屏，有心思。呢部08ist仲有一個強項，只行過500公里，因為係日本DemoCar嚟㗎！
8.Facelift後嘅ist有埋側鏡指揮燈。
9.最有趣係呢個似錶板嘅三圓按鈕連液晶顯示組合。
10.後排淺色配搭，令已經擴大了嘅空間更富開揚感。
11.全新設計嘅中控台及錶版甚有獨特型格。
12.摺叠後排，空間運用更靈活。
13.門邊開關把手像個橫放小酒樽。
14.原廠16吋輪圈比上一代大些少，配合增大咗嘅車身啱啱好。
08ist規格
引擎：1,797ccDualVVT-i
馬力：約132匹
傳動：4前速自動波
行車里數：500km
售價：$178,000