華爾街「賺錢之神」約翰保爾森（JohnPaulson）憑藉美國次按風暴一役，喺2007年狂賺兩百幾、三百億港紙而舉世震驚，華華相信跟佢搵食嘅左右手都一定發過豬頭。
之不過，賺幾多錢都好，有料之人未必甘心一世寄人籬下，《華爾街日報》就報道，喺次按風暴裏面，幫保爾森搵大錢嘅佩萊格里尼（PaoloPellegrini），已經遞信同老闆請辭，仲打算另起爐灶，落手落腳搞番一間屬於自己嘅對冲基金公司。
發掘高危產品等沽空
現年52歲嘅佩氏，生於意大利，以前做過銀行家，喺2004年加入保爾森寶號Paulson&Co.。據報道形容，佢喺保爾森麾下對冲基金擔當重要角色，專責發掘超級高危嘅次按債券相關產品，兼搵埋點樣賺得最盡嘅方法，提供畀老闆去大手沽空。公司賺大錢，佢絕對係有功有勞嗰隻，今次一走可以話係保爾森嘅損失。
基金規模縮唔易籌旗
至於佩萊格里尼決定自立門戶，是福是禍暫時真係天曉得，但係根據基金研究機構理柏（Lipper）最新估計，今年頭兩季對冲基金業規模會繼續萎縮，唔知佩氏靠自己個朵，可唔可以籌夠錢搞基金呢？
好彩佢同保爾森係和平咁分手，咁人情留一線，即係日後好相見啦，若果真係自己撈唔掂，或者仲有機會吃回頭草吖嘛！
李華華
mailto:[email protected]