可能諗住3G發牌之後有排唔得閒，吞埋網通正式坐大嘅新聯通（762）話事人常小兵，日前深夜時分抽空接受內地雜誌《英才》獨家訪問，講吓佢由行業重組、同網通合併到就快有3G牌所經歷嘅點點滴滴，仲爆埋原來賣CDMA網、同網通合併，都係喺清晨6點幾「扑槌」。原來早起嘅鳥兒唔止有蟲食，仲可以做大刁！
話時話，聯通噚日正式獲大股東通知，話同網通嘅合併已獲國資委批准並已經生效，真係辛苦晒大家！
講番常總篇訪問，精髓係最尾嗰段，做過官又喺中電信（728）撈過嘅小兵哥，到底覺得邊份工最有挑戰性？佢話：「這三份工作，使我學會在複雜的環境下去生存、去工作，按常理人們肯定認為我在聯通遇到的問題更有挑戰性，這可能也沒錯，但真正身處其境，熟悉了這個環境後，拋開表象，其實很多東西是差不多的，無非是處理人的事、處理利益的事、處理發展的事，只是表現形式不同而已。」簡直係modelanswer之中嘅modelanswer！