衣食足而知榮辱，對中國人嚟講，係咪真係醫飽肚先可以講人權呢？左派近日指首要搞好經濟，2012政改方案應該按下不表，攤一攤，遲啲先拎出嚟傾都未遲，等到年尾先出爐亦得。
前任全國人大常委曾憲梓噚日出席一個活動時，就政改發表偉論，佢話喺呢啲咁艱難嘅時刻，未係時候講政改呢啲嘢，「大家食飽個肚至算啦。」未解決三餐，係咪真係唔可以談政改呢？定係曾憲梓「聞」到煲呔個政改方案好惡啃，相信香港人好難食得落，所以叫大家打定底，如果唔啱食嘅，就唔好勉強接受，請煲呔食檸檬？
公民黨靜坐唔絕食
既然曾憲梓話食飽先可以談政改，公民黨今次聽晒佢話，噚日起靜坐爭取2012普選，不過唔會絕食。據講該黨做足準備工夫，搵定中環、灣仔一帶通宵茶餐廳電話，一旦肚餓即刻打電話叫外賣，人人食飽晒，咁就符合曾憲梓爭取普選嘅條件啦。公民黨黨魁余若薇話佢哋不絕食並非錫身之故，而係因為爭取普選係長期鬥爭，不能有前冇後一味快放，應該留前鬥後保留實力，慢慢同煲呔周旋。