美國經濟危殆，花旗國政府不斷透過泵錢入市場刺激經濟，而呢啲錢嘅來源，主要係靠國債支持。瑞信亞洲區首席經濟師陶冬噚日笑住話，即將上任嘅新總統奧巴馬，佢嘅政府將會承擔最多債務，奧巴馬可望成為歷任美國總統最大「赤字王」。
肯定唔會買美債
陶冬預期，美國政府最終要向市場泵水7000億甚至1萬億美元嚟救經濟，係歷來最大救市方案；佢仲好抵死咁話，美國可能會換晒聯邦政府嘅燈泡、修吓馬路，對香港嘅出口市場雖然冇乜大幫助，但至少可以給予市場信心。
不過，呢個瀕臨破產嘅政府，透過最低廉嘅成本發債，而投資者喺冇乜好投資嘅情況下，迫住去認購，好可能會造成債市泡沫，陶冬估計，美國債市將會係今年最大波動市場之一。
中國政府𠵱家係美債最大債主，仲繼續增持緊，佢相信唔係簡單嘅商業判斷，但自己就肯定唔會買美債咁話。